Luk 3 | NdeIBE | STEP | Ngomnyaka wetshumi lanhlanu wokubusa kukaThibheri Khesari – ngesikhathi uPhontiyu Philathu engumbusi eJudiya, uHerodi engumbusi eGalile, umfowabo uFiliphu engumbusi wase-Ithuriya leThrakhonithi, njalo loLisaniya engumbusi wase-Abhilene

Luke 3

UJohane UMbhaphathizi Ulungisa Indlela

1 Ngomnyaka wetshumi lanhlanu wokubusa kukaThibheri Khesari – ngesikhathi uPhontiyu Philathu engumbusi eJudiya, uHerodi engumbusi eGalile, umfowabo uFiliphu engumbusi wase-Ithuriya leThrakhonithi, njalo loLisaniya engumbusi wase-Abhilene – 2 ngesikhathi leso u-Anasi loKhayifa bengabaphristi abaphezulu, kwafika ilizwi likaNkulunkulu kuJohane indodana kaZekhariya esenkangala.

3 Wawuhamba wonke ummango waseJodani, etshumayela ubhaphathizo lokuphenduka ukuze izono zithethelelwe. 4 Njengoba kulotshiwe encwadini yamazwi ka-Isaya umphrofethi ukuthi: “Ilizwi lalowo omemezayo enkangala lisithi, ‘Lungiselani iNkosi indlela, yenzeleni izindlela eziqondileyo.

5 Zonke izigodi zizagcwaliswa, zonke izintaba lamaqaqa kuzafinyezelwa phansi. Izindlela zonke ezimazombezombe zizaqonda, izindlela ezimakhilikithi zizakuba ngumthalala.

6 Abantu bonke bazayibona insindiso kaNkulunkulu.”

7 UJohane wathi emaxukwini abantu abezayo ukuthi azobabhaphathiza, “Lina nzalo yezinyoka! Lilimukiswe ngubani ukuthi libalekele ulaka oluzayo na?

8 Thelani izithelo ezihambelana lokuphenduka. Futhi lingaziyengi ngokuthi, ‘Thina silo-Abhrahama ongubaba wethu.’ Ngoba ngilitshela ukuthi ngawonala amatshe uNkulunkulu angamenzela abantwana u-Abhrahama.

9 Ihloka selibekiwe ezimpandeni zezihlahla, kuthi-ke lesosihlahla esingatheliyo izithelo ezilungileyo sizaqunywa siphoselwe emlilweni.”

10 Abantu bambuza bathi, “Pho kumele senzeni na?”

11 UJohane waphendula wathi, “Leyondoda elamajazi amabili kayimuphe ongelalo elinye lalowo olokudla kenze njalo.”

12 Labathelisi labo beza ukuzabhaphathizwa. Babuza bathi, “Mfundisi, kumele senzeni na?”

13 Wabatshela ukuthi, “Lingathelisi ledlulise okufunekayo.”

14 Abanye abebutho bambuza bathi, “Thina-ke senzeni?” Waphendula wathi, “Lingacindezeli ukuthi liphiwe imali njalo lingabeki muntu umlandu wamanga – yaneliswani ngumholo wenu.”

15 Abantu babehlezi belindele, njalo bonke babezibuza ezinhliziyweni zabo ingabe uJohane wayenguye yini uKhristu. 16 UJohane wabaphendula bonke wathi, “Mina ngilibhaphathiza ngamanzi. Kodwa yena olamandla kulami uzakuza, mina okungangilingananga ukuthukulula imichilo yamanyathelo akhe. Uzalibhaphathiza ngoMoya oNgcwele langomlilo. 17 Ukhunimbaxa lwakhe lokwela useluphethe ezandleni ukuba ele asuse esizeni abuthele amabele akhe esiphaleni, kodwa uzatshisa amakhoba ngomlilo ongacimiyo.”

18 Abantu waphinde wabalaya ngamanye amazwi amanengi anjalo watshumayela kubo izindaba ezimnandi.

19 Kodwa kwathi uJohane esekhuze uHerodi umbusi ngenxa kaHerodiya, umkamfowabo, langezinye izinto ezimbi ayezenzile, 20 uHerodi wakwengezelela lokhu kuzo: Wamvalela uJohane entolongweni.

Ukubhaphathizwa KukaJesu Losendo Lwakhe

21 Kwathi bonke abantu bebhaphathizwa, loJesu laye wabhaphathizwa. Wathi ekhuleka izulu lavuleka 22 uMoya oNgcwele wehlela kuye elesimo sejuba. Kweza ilizwi livela ezulwini lathi: “Wena uyiNdodana yami engiyithandayo; ngiyathokoza kakhulu ngawe.”

23 UJesu wayeseleminyaka engaba ngamatshumi amathathu eqalisa umsebenzi wakhe wokutshumayela. Kwakukhunjulwa ukuthi uyindodana kaJosefa, indodana kaHeli, 24 indodana kaMathathi, indodana kaLevi, indodana kaMeliki, indodana kaJanayi, indodana kaJosefa,

25 indodana kaMathathiyasi, indodana ka-Amosi, indodana kaNahumi, indodana ka-Esili, indodana kaNagayi,

26 indodana kaMahathi, indodana kaMathathiyasi, indodana kaSemeyini, indodana kaJoseki, indodana kaJoda,

27 indodana kaJohanani, indodana kaResa, indodana kaZerubhabheli, indodana kaSheyalithiyeli, indodana kaNeri, 28 indodana kaMeliki, indodana ka-Adi, indodana kaKhosamu, indodana ka-Elimadami, indodana ka-Eri,

29 indodana kaJoshuwa, indodana ka-Eliyezeri, indodana kaJorimu, indodana kaMathathi, indodana kaLevi, 30 indodana kaSimiyoni, indodana kaJuda, indodana kaJosefa, indodana kaJonami, indodana ka-Eliyakhimu,

31 indodana kaMeleya, indodana kaMena, indodana kaMathatha, indodana kaNathani, indodana kaDavida,

32 indodana kaJese, indodana ka-Obhedi, indodana kaBhowazi, indodana kaSalimoni, indodana kaNashoni,

33 indodana ka-Aminadabi, indodana kaRama, indodana kaHezironi, indodana kaPherezi, indodana kaJuda, 34 indodana kaJakhobe, indodana ka-Isaka, indodana ka-Abhrahama, indodana kaThera, indodana kaNahori,

35 indodana kaSerugi, indodana kaRewu, indodana kaPhelegi, indodana ka-Ebheri, indodana kaShela, 36 indodana kaKhayinani, indodana ka-Ariphahadi, indodana kaShemu, indodana kaNowa, indodana kaLameki,

37 indodana kaMethusela, indodana ka-Enoki, indodana kaJaredi, indodana kaMahalaleli, indodana kaKhenani, 38 indodana ka-Enoshi, indodana kaSethi, indodana ka-Adamu, indodana kaNkulunkulu.